سائلنا إسراء تحكي لنا عن قصة تبنيها للولا.
انا اتبنيت لولا من Leaf Animals فى يونيو ٢٠٢١
كان عندى قط بحبه جدا جدا و اتوفى و بعدها فضلت حوالى ١٠ شهور نفسيتى تعبانه جدا لانى كنت متعلقه بيه اوى و كنت مترددة اجيب قطة او قط تانى و كنت مقررة انى لو هاخد الخطوة دى هتبنى حالة محتاجة مساعدة لانى بحب جدا الحيوانات و بحاول انقذ على قد ما اقدر فا دورت على الانترنت على مكان للتبنى لحد ما لقيت Leaf Animals ظهرلى و دخلت اتفرجت شوية لحد ما شفت لولا على الويبسايت حسيت انى حبيتها اوى و قررت اتبناها.
بعد ما اتبنيت لولا بحوالى ٣ اسابيع كنت راجعة البيت لقيت قط تحت البيت عندى فى الشارع و اول ما شفته اخدته.
بعد ما عملتله كل اللازم و روحت بيه البيت طبعا انا غلطت لانى معرفتهمش على بعض بالطريقة المفروض اعملها و خليتهم يشوفو بعض على طول بدون مقدمات و بدون ما يكون التعارف تدريجى طبعا لولا اول ما شافته اتضايقت جدا و خافت و كانت عدوانية معاه اوى و كانت بتضربه.
فضلت فترة كبيرة جدا افصل بينهم و انا برة البيت و فضلت متابعاهم طول الوقت و انا فى البيت لان كان بيحصل ضرب كتير جدا و ده كان مسببلى تعب و ضغط نفسى طول الوقت لدرجة انى جالى حالة من اليأس و كنت هتخلى عن حد فيهم عشان ارتاح لانى مكنتش بعرف انام بليل بسببهم و طول اليوم بحاول افصل بينهم ف الضرب و كل ما اخرج برة البيت لازم افصلهم كل حد فى مكان مقفول عليه فا كل ده كان تاعبنى و القط الولد كان بيصعب عليا جدا لانه كان صغير و لولا كانت بتضربه و مكنش بيعرف يدافع عن نفسه.
كنت دايما على تواصل مع امينه و بسألها اعمل ايه و هى بصراحة كانت طول الوقت بتدعمنى و بتساعدنى و تبعتلى فيديوهات و مقالات عن ازاى اتعامل فى المواقف دى و دايما كانت موجودة لما كنت بحتاجها و هى بصراحة اللى شجعتنى انى اصبر عليهم و متسرعش و حكتلى تجارب كتير عن المواقف دى و ده كان بيشجعنى و فعلا صبرت شهوووور كتير لحد ما كملنا سنه مع بعض و طبعا دلوقتى الوضع احسن بمراحل عن الاول.
السنه اللى عدت دى كانت صعبة جدا جدا بس بالتدريج الدنيا بتتحسن و عدد مرات الضرب قلت فى اليوم عن الاول بعدين بقى مش كل يوم و بقو يحاولو يتجنبو بعض بس طبعا فيه ضرب بس اقدر اقول الوضع مقبول و احسن بكتير جدا عن الشهور الاولى.
الحيوانات بالذات اللى بيكون عندها تجارب سيئة و بتكون عاشت ف الشارع فترة و اتضربت و جاعت و بردت و حست كل الاحاسيس الوحشة دى بيكون عندهم عدم ثقة و عدم شعور بالامان. و بيفضلو كدة مدة كبيرة جدا شهور و ممكن سنين و ده اللى حصل معايا مع لولا، كانت فى الشهور الاولى عدوانية بسبب خوفها المرضى و كانت كل ما اقرب منها تفتكرنى هأذيها، و تعمل رد فعل دفاعى و كانت مش بتثق فيا نهائى ولا بتيجى تقعد جمبى. كانت على طول قعدة لوحدها، لكن مع الوقت اكتسبت الثقة من معاملتى ليها و بقينا صحاب جدا و بتيجى ورايا ف كل حته و تطلع تنام جمبى و تجيلى عشان ادلعها و الكلام ده كله مؤخرا، و اخد وقت كبير عشان يحصل.
عشان كل لازم الناس تصبر على الحيوانات اللى اتعرضو لاذى لانهم بيكون عندهم عدم ثقة و عدم امان و ده بيروح مع الوقت مع الصبر و المعاملة الطيبة.